Selasa, 12 Februari 2013

Kato Pasambahan



KATO PASAMBAHAN

Foto: Para pemuda sedang belajar kato pasambahan dirumah saya(Yaser)



Kapalo mudo:  Sungguahpun amak nan baimbau sifaek,e ateh silang nan bapangka, karajo nan bajunjuang  tatumpah kato ka bakeh amak. Ba,a lah diambo Kini diambo mak, alak basobok lo di ambo undang-undang urang tuo, undang siang ba abih aghi, undang malam baabih minyak. Ba,a bana undang siang ba abih aghi, alah bamakasuik basingajo. Ba,a bana undang malam ba abih minyak, aghi lah batambah lauik pulo. Dek karano aghi alah lauik, mato ampie takantuak, lah takana di hati, tacinto dipikiran handak mambaco undiangan diateh jalan nan luruih kato nan bana lah ka jadi ka ambo baco. Sakian bana

Mamak: “sampai kapalo mudo??

Kapalo mudo: sampai mak.

Mamak: manuruik pasaran biaso kato kapalo mudo kan kabajawauk capek, undiangan kapalo mudo kabapulangan lakeh, ba,a dek karano ambo ndak surang tasabuik namo taimbau gala dek kapalo mudo tadi, rupoe ambo bajalan nak baiyo, bakato nak bamolah dulu, undiangan taradok kabakeh kapalo mudo janji ambo pinta, istirahaik ambo tiboan, mananti kapalo mudo sabanta. Sakian Bana

Kapalo mudo: Sampai mak?

Mamak: Sampai kapalo mudo.

Kapalo mudo: manuruik pasaran  biaso kato ambo kan kabajawauk capek, undiangan ambo kabapulangan lakeh, ba,a dek amak indak surang tasabuik namo taimbau gala dek ambo tadi, rupoe amak bajalan nak baiyo, bakato nak bamolah dulu. Undiangan taradok bakeh ambo janji bapintak, istirahaik batiboan. Kan iyo baitu??... Ba,a dek ambo, asa kato kabajawauk, undiangan kabapulangan, insyaallah paiyoan lah, nak ambo nanti sakiro. Sakian bana

Mamak: iyo ambo paiyoan?

Kapalo mudo: InsyaAllah.

(Mamak memanggil salah seorang “urang sumando”)

Mamak: Sutan.. Sungguahpun sutan nan ambo imbau, tapi sifaik,e ateh sagalo urang sumando nan duduak saparadok. Satempo diawa,e tadi alek nan datang mandatangan undiangan, tembak nan baalamaik, pandang nan batujuan, tembak,e kabakeh ambo tujuan,e kabakeh kito nan saparadok. Ba,a dek ambo kato nan baru bajawauk, undiangan alun bapulangan, a nan lai, janji bapintak istirahaik batiboan kabakeh inyo. Dek inyo alah mananti, dek ambo itu nan ambo paiyoan kabakeh sutan. Tantang nan ma nanambo paiyoan, tantang kato nan kabajawauk, undiangan kabapulangan taradok alek nan datang. Sakian bana.

Sutan: Sampai mak?

Mamak: Sampai sutan.
Sutan: Kini baitu mak, Satempo diawa,e tadi alek nan datang mandatangan undiangan, tembak nan baalamaik, pandang nan batujuan, tembak,e kabakeh ammak tujuan,e kabakeh kito nan saparadok. Ba,a dek amak kato nan baru bajawauk, undiangan alun bapulangan, a nan lai, janji bapintak istirahaik batiboan kabakeh inyo. Dek inyo alah mananti, dek amak itu nan ambo paiyoan kabakeh sutan. Tantang nan amak paiyoan, tantang kato nan kabajawauk, undiangan kabapulangan taradok alek nan datang.Tapi sifaek,e diambo ateh sagalo urang sumando nan duduak saparadok, Kan yo baitu?
Ba,a dek ambo mak, ateh bana di lahie,e kato amak kan kabajawauk capek, undiangan amak kan kabapulangan lakeh, ba,a dek karano ambo indak surang tasabuik namo taimbau gala dek amak tadi, rupoe ambo bajalan nak baiyo, bakato nak bamolah dulu, undiangan taradok bakek amak, janji lo ambo pintak, istirahaik lo ambo tiboan, mananti amak sabanta. Sakian bana.

Mamak: sampai Sutan?

Sutan: Sampai mak.

Mamak: Kini baitu sutan, Manruik pasaran biaso kato ambo kan kabawauk capek, undiangan ambo kan kabapulangan lakeh, ba,a dek karano sutan indak surang tasabuik namo taimbau gala dek ambo tadi, rupoe sutan bajalan nak baiyo, bakato nak bamolah dulu, Undiangan taradok kabakeh ambo, janji bapintak, istirahaik batiboan, kan iyo baitu?? Ba,a dek ambo, asa kato lai kabajawauk, undiangan kabapulangan, insyaallah paiyoan lah, nak ambo nanti sakiro. Sakian bana.

Sutan: iyo paiyoan ko?

Mamak: insyaallah.

(Sutan Mampaiyoan ka urang sumando yang lain, setelah itu dia kembali memanggil mamak)


Sutan: mak.. Kini baitu mak, satempo diawa,e tadi undiangan amak ambo pajanjian, karano ambo bajalan indak baiyo, bakato indak bamolah dulu, dek amak alah mananti, dek ambo alah pulo ambo paiyoan. A bana paiyoan ambo tu, alah bulek aie di pambuluah, alah tajun aie dipamatang, jikok bulek,e lah bisa digolek,an, jikok picak,e lah bisa dilayangan, lah saiyo kaji tantang itu, tantang kato kamanjawauk, undiangan kamamulangan taradok bakeh amak, alah diambo lo tarabik,e mah mak. Sakian bana.

Mamak: sampai sutan?

Sutan: Sampai mak.

Mamak: Kini baitu sutan, satempo diawa,e tadi undiangan ambo sutan pajanjian, dek karano sutan bajalan indak baiyo, bakato ndak bamolah dulu, undiangan taradok kabakeh ambo janji bapintak, istirahaik batiboan. Kan yo baitu?
Dek ambo alah mananti, dek sutan alah pulo baioaiyoan. A bana paiyoan sutan tu,alah bulek aie di pambuluah, alah tajun aie dipamatang, jikok bulek,e lah bisa digolek,an, jikok picak,e lah bisa dilayangan, lah saiyo kaji tantang itu. Tantang kato kamanjawauk, undiangan kamamulangan taradok bakeh amak alah di sutan lo tarabik,e mah. Kan iyo baitu?
Ba,a dek ambo, jauah tampak asok, ampie tampak api, nan baado adangan tadi kan antaro kito baduo, kini sutan lo nan mamulangan liak. Saancak-ancak tu nyeh. Sakian bana.

Sutan: Sampai Mak?

Mamak: Sampai Sutan.

Sutan: Nan jadi ban dek ambo kabakeh amk kan mamulangan undiangan amak, ba,a dek amak tantang itu ibaraik jalan alah baluangan ibaraik kato alah bacabaan. Ba,a nyoh lai kini, disabuik baawa baakie bamulai bakasudahan jikok satempo diawae tadi nan jadi bana dek amak kabakeh ambo kan alek nan datang mandatangan undiangan, tembak baalamaik, pandangan batujuan, tembak,e kabakeh amak tujuan,e kabakeh kito nan saparadok. Ba,a dek amak kato nan baru bajawauk undiangan alun bapulangan. A nan lai janji bapintak istirahaik batiboan kabakeh inyo. Ba,a dek inyo alah mananti, ba,a dek amak itu nan amak baiyoan kabakeh ambo tantang nan ma amak paiyoan tantang kato kamanjawauk undiangan kamamulangan taradok alek kito nan datang. Ba,a dek ambo undiangan amak tu kan alah pulo ambo paiyoan, diateh ambo saampaan tagak sapamatang, jikok bulek,e alah sagolek picak,e alah salayang lah saiyo kaji tantang itu. Undiangan taradok alek nan datang, lah samupakaik kami ateh ughang sumando, pulanganlah dek amak, kami nan disiko alah didalam. Sakian bana

Mamak: Sampai Sutan?

Sutan: Sampai mak
Mamak: Satempo diawae tadi nan jadi bana dek ambo kabakeh sutan kan mamulangan undiangan taradok alek nan datang. Ba,a dek sutan nan basabuik alah dapek kato samupakaik antaro sutan duduak saampaan tagak sapamatang, jikok bulek,e alah sagolek, picak,e alah salayang, alah saiyo kaji tantang itu. Tantang kato kamanjawauk undiangan kamamulangan taradok alek nan datang kan batumpahan kabadan diri ambo? Ba,a dek ambo, satu ambo urang paamuah kaduo ambo urang panyaba, sabalah ambo tantang itu, amuah ambo mamulangan, akan tetapi senteang tolong bilai, kurang tolong tukuak, kurang takan tolong timbuean. Sakian bana

Sutan: Sampai mak?

Mamak: Sampai sutan.

Sutan: Nan jadi ban dek ambo kabakeh amak kan maulangan undiangan taradok alek nan datang. Ba,a dek amak nan basabuik satu amak urang paamuah kaduo amak urang panyaba, sabalah amak tantang itu, amuah amak mamulangan, akan tetapi cameh jo nan kaanyuik tagamang jo nan kajatuah, artinyo bana senteang mintak bilai, kurang mintak tukuak, kurang takana mintak timbuean. Kan yo baitu?
Ba,a dek ambo diateh nan lai senteang ambo bilai, kurang ambo tukuak, kurang takan ambo timbuean. Tapi ateh nan indak sagalo nan tabaco di amak tadi lah manuah ambo mah mak. Sakian Bana,

Mamak: sampai sutan?

Sutan: Sampai mak

Mamak:  Nan jadi bana dek ambo kabakeh sutan kan mamulangan undiangan alek kito nan datang? Ba,a dek sutan tantang itu, bisa tagamang lai kabajawek bisa anyuik lai kabasonsong, lah sanang pulo hati ambo. Yo ambo pulangan lai?

Sutan: InsyaAllah.

(Lalu mamak kembali memanggil kapalo mudo)

Mamak: Kapalo mudo.. Kini baitu Kapalo mudo, satempo diawa,e tadi undiangan Kapalo mudo ambo pajanjian, karano ambo bajalan indak baiyo, bakato indak bamolah dulu, dek Kapalo mudo alah mananti, dek ambo alah pulo ambo paiyoan. A bana paiyoan ambo tu, alah bulek aie di pambuluah, alah tajun aie dipamatang, jikok bulek,e lah bisa digolek,an jikok picak,e lah bisa dilayangan, lah saiyo kaji tantang itu, tantang kato kamanjawauk, undiangan kamamulangan taradok bakeh Kapalo mudo, alah diambo lo tarabik,e mah mak. Sakian bana

Kapalo Mudo: Sampai mak?

Mamak: Sampai kapalo mudo
Kapalo mudo: Kini baitu amak, satempo diawa,e tadi undiangan ambo pajanjian, dek karano amak bajalan indak baiyo, bakato ndak bamolah dulu, undiangan taradok kabakeh ambo janji bapintak, istirahaik batiboan. Kan yo baitu?
Dek ambo alah mananti, dek amak alah pulo baioaiyoan. A bana paiyoan amak tu,alah bulek aie di pambuluah, alah tajun aie dipamatang, jikok bulek,e lah bisa digolek,an, jikok picak,e lah bisa dilayangan, lah saiyo kaji tantang itu. Tantang kato kamanjawauk, undiangan kamamulangan taradok bakeh amak alah di amak lo tarabik,e mah. Kan iyo baitu?
Ba,a dek ambo, jauah tampak asok, ampie tampak api, nan baado adangan tadi kan antaro kito baduo, kini amak lo nan mamulangan liak. Saancak-ancak tu nyeh. Sakian bana.

Mamak: Sampai kapalo mudo?

Kapalo mudo: Sampai mak.

Mamak: Nan jadi bana dek ambo kabakeh kapalo mudo kan mamulangan undiangan kapalo mudo, ba,a dek kapalo mudo nan tantang itu ibaraik jalan alah baluangan ibaraik kato alah bacabaa. Ba,a dek ambo disabuik baawa baakie jikok satempo diawe tadi nan jadi ban dek kapalo mudo kabakeh ambo kan dek karano aghi alah lauik mato ampie takantuak, alah takana dihati tacinto dipikiran handak mambaco undiangan diateh jalan nan luruih kato nan bana lah kajadi kakapalo mudo baco. Kan yo baitu? Ba,a dek ambo jikok ado rasoe nan takan dihati tacinto dipikiran handak mambaco undiangan diateh jalan nan luruih kato nan bana, bacolah nak kami danga. Sakian bana.
Kapalo mudo: sampai mak?

Mamak: Sampai kapalo mudo.

Kapalo mudo: Satempo diawae tadi ambo kan handak mambaco undiangan, ba,a tantang handak mambaco undiangan ibaraik jalan alah baluangan ibaraik jalan alah bacabaa. Ba,a nyoh lai kini dek ambo, takalo undiangan ka ambo baco kato kaambo sabuik, tumbuah caro na manangko kan babaokan lagu caro adaik pakaiannyo. A bana lagu caro adaik pakaiannyo, bataratik manjilih balelo bakurenah, basambah bainjiangan tangan mangko undiangan kadilaluan. Tantang taratik jo manjilih balelo bakurenah lai samo kito pakaian, cuman nan jadi pintak jo handak dek tantang sambah jo injianagn tangan. Samba mintak dipamulie injiangan tangan mintak dilatak,an, sahinggo undiangan sajo nan kaambo baco. Sakian bana.

Mamak: Sampai kapalo mudo?

Kapalo mudo: Sampai mak.

Mamak:  manuruik pasaran biaso kato kapalo mudo kan kabajawauk capek, undiangan kapalo mudo kabapulangan lakeh, ba,a dek karano ambo ndak surang tasabuik namo taimbau gala dek kapalo mudo tadi, rupoe ambo bajalan ndak baiyo, bakato ndak bamolah dulu, undiangan taradok kabakeh mamak janji ambo pinta, istirahaik ambo tiboan, mananti kapalo mudo sabanta. Sakian Bana

Kapalo mudo: manuruik pasaran  biaso kato ambo kan kabajawauk capek, undiangan ambo kabapulangan lakeh, ba,a dek amak indak surang tasabuik namo taimbau gala dek ambo tadi, rupoe amak bajalan nak baiyo, bakato nak bamolah dulu. Undiangan taradok bakeh ambo janji bapintak, istirahaik batiboan. Kan iyo baitu??... Ba,a dek ambo, asa kato kabajawauk, undiangan kabapulangan, insyaallah paiyoan lah, nak ambo nanti sakiro. Sakian bana

Mamak: iyo ambo paiyoan?

Kapalo mudo: InsyaAllah.

(Mamak memanggil salah seorang “urang sumando”)

Mamak: Sutan.. Satempo diawae tadi alek kito nan datang handak mambaco undiangan, ba,a tantang handak mambaco undiangan ibaraik jalan alah baluangan ibaraik kato alah bacabaa. Ba,a nyoh lai kini dek inyo takalo undiangan ka inyo baco kato kaambo sabuik, tumbuah caro na manangko kan babaokan lagu caro adaik pakaiannyo. A bana lagu caro adaik pakaiannyo, bataratik manjilih balelo bakurenah, basambah bainjiangan tangan mangko undiangan kadilaluan. Tantang taratik jo manjilih balelo bakurenah lai samo kito pakaian, cuman nan jadi pintak jo handak dek tantang sambah jo injianagn tangan. Samba mintak dipamulie injiangan tangan mintak dilatak,an, sahinggo undiangan sajo nan kainyo baco. Baitu kato inyo. Ba,a dek ambo kato nan baru bajawauk, undiangan alun bapulangan, a nan lai, janji bapintak istirahaik batiboan kabakeh inyo. Dek inyo alah mananti, dek ambo itu nan ambo paiyoan kabakeh sutan. Tantang nan ma nanambo paiyoan, tantang kato nan kabajawauk, undiangan kabapulangan taradok alek nan datang. Tapi sungguah pun dek sutan sipaik,e ateh sagalo urang sumando nan duduak saparadok.  Sakian bana.

Sutan: Sampai mak?

Mamak: sampai

Sutan: : Satempo diawae tadi alek kito nan datang handak mambaco undiangan, ba,a tantang handak mambaco undiangan ibaraik jalan alah baluangan ibaraik kato alah bacabaan. Ba,a nyoh lai kini dek inyo takalo undiangan ka inyo baco kato kaambo sabuik, tumbuah caro na manangko kan babaokan lagu caro adaik pakaiannyo. A bana lagu caro adaik pakaiannyo, bataratik manjilih balelo bakurenah, basambah bainjiangan tangan mangko undiangan kadilaluan. Tantang taratik jo manjilih balelo bakurenah lai samo kito pakai, cuman nan jadi pintak jo kahandak dek inyo tantang sambah jo injiangan tangan. Samba mintak dipamulie injiangan tangan mintak dilatak,an, sahinggo undiangan sajo nan kainyo baco. Baitu kato inyo. Ba,a dek amakkato nan baru bajawauk, undiangan alun bapulangan, a nan lai, janji bapintak istirahaik batiboan kabakeh inyo. Dek inyo alah mananti, dek amakitu nan ambo paiyoan kabakeh ambo. Tantang nan ma nan amak paiyoan, tantang kato nan kabajawauk, undiangan kabapulangan taradok alek nan datang. Tapi sungguah pun dek ambo sipaik,e ateh sagalo urang sumando nan duduak saparadok. Kan iyo baitu?
Ba,a dek ambo ateh bana dilahie,e kato amak kan iyo kabajawauk capek undiangan amak kan kapaulangan lakeh, ba,a dek ambo ndak sughang tasabuik namo taimbau gala dek amak tadi, rupoe ambo bajalan nak baiyo bakato nak bamolah dulu. Undiangan taradok kabakeh amak janji ambo pintak istirahaik ambo tiboan. Mananti amak sabanta. Sakian bana.

Mamak: Sampai sutan?

Sutan: Sampai mak

Mamak:  manuruik pasaran  biaso kato ambo kan kabajawauk capek, undiangan ambo kabapulangan lakeh, ba,a dek Sutan indak surang tasabuik namo taimbau gala dek ambo tadi, rupoe Sutan bajalan nak baiyo, bakato nak bamolah dulu. Undiangan taradok bakeh ambo janji bapintak, istirahaik batiboan. Kan iyo baitu??... Ba,a dek ambo, asa kato kabajawauk, undiangan kabapulangan, insyaallah paiyoan lah, nak ambo nanti sakiro. Sakian bana

Sutan: iyo ambo paiyoan?

Mamak: InsyaAllah.

(Sutan memusyarahkan kepada urang sumando yang lain)

Sutan: Kini baitu amak, satempo diawa,e tadi undiangan ambo pajanjian, karano ambo bajalan indak baiyo, bakato indak bamolah dulu, dek amakalah mananti, dek ambo alah pulo ambo paiyoan. A bana paiyoan ambo tu, alah bulek aie di pambuluah, alah tajun aie dipamatang, jikok bulek,e lah bisa digolek,an jikok picak,e lah bisa dilayangan, lah saiyo kaji tantang itu, tantang kato kamanjawauk, undiangan kamamulangan taradok bakeh amak, alah diambo lo tarabik,e mah mak. Sakian bana
Mamak: Kini baitu Sutan, satempo diawa,e tadi undiangan ambo pajanjian, dek karano Sutan bajalan indak baiyo, bakato ndak bamolah dulu, undiangan taradok kabakeh ambo janji bapintak, istirahaik batiboan. Kan yo baitu?
Dek ambo alah mananti, dek Sutan alah pulo baioaiyoan. A bana paiyoan Sutan tu,alah bulek aie di pambuluah, alah tajun aie dipamatang, jikok bulek,e lah bisa digolek,an, jikok picak,e lah bisa dilayangan, lah saiyo kaji tantang itu. Tantang kato kamanjawauk, undiangan kamamulangan taradok bakeh ambo alah di Sutan lo tarabik,e mah. Kan iyo baitu?
Ba,a dek ambo, jauah tampak asok, ampie tampak api, nan baado adangan tadi kan antaro kito baduo, kini Sutan lo nan mamulangan liak. Saancak-ancak tu nyeh. Sakian bana.

Sutan: Sampai mak?

Mamak: sampai sutan

Sutan: Kini baitu mak.. nan jadi bana dek ambo kabakeh amak kan mamulangan undiangan amak, ba,a dek amak tantang itu ibaraik jalan baluangan ibaraik kato bacabaan. Ba,a nyoh lai kini disabuik baawa baakie bamulai bakasudahan jikok satempo diawae tadi nan jadi bana dek amak kabakeh ambo kan alek nan datang mandatangan undiangan, tembak baalamaik pandangan batujuan, tembak,e kabakeh amak tujuan,e kabakeh kito saparadok. Ba,a dek amak tantang itu kayo nan baru manjawauk undiangan alun bapulangan. A nan lai janji bapintak istirahaik batiboan kabakeh inyo. Kan iyo baitu?
Ba,a dek ambo undiangan amak tu kan alah pulo ambo paiyoan, diateh ambo nan duduak saamapaan tagak sapamatang. Jikok bulek,e lah sagolek picak,e lah salayang lah saiyo kaji tantang itu. Tantang kato kamanjawauk undiangan kamaulangan taradok alek kito nan datang, pulangan jo lah dek amak, kami disiko alah saniak samukasuik. Sakian bana.

Mamak: Sampai sutan?

Sutan: Sampai mak.

Mamak: nan jadi bana dek ambo kabakeh sutan ka mamulangan undiangan taradok alek kito nan datang. Ba,a dek sutan nan basabuik alah dapek lo kato samupakaik antaro sutan nan duduak saampaan tagak sapamatang, jiko bulek,e sagolek picak,e salayang lah saiyo kaji tantang itu. Tantang kato kamanjawauk undiangan kamamulangan taradok alek kito nan datang ka batumpahan kabadan diri ambo.
Ba,a dek ambo stu ambo urang paamuah kaduo ambo urang panyaba, sabalah ambo tantang itu amuah ambo mamulangan. Akan tetapi lah dapek lo undang-undang nan tuo dek ambo, a ban undang-undang nan tuo tuo
patah kalam pakabaran sampai
ayam bakukuak murai bakicau
pintandan aghi kasiang
kok senteang tolong bilai
kok kurang tolong tukuak
tolong sisik di nan ompang
Sakian bana.

Sutan: Sampai mak?

Mamak: Sampai sutan
Sutan: nan jadi dek ambo kabakeh amak kan ojok mamulangan undiangan taradok alek kito nan datang. Ba,a dek amak na basabuik stu amak urang paamuah kaduo amak urang panyaba, sabalah amak tantang itu amuah amak mamulanga, akan tetapi lah basuo lo undang-undang nan tuo dek amak, a bana undang-undang nan tuo tu
patah kalam pakabaran sampai
ayam bakukuak murai bakicau
pintandan aghi kasiang
kok senteang tolong bilai
kok kurang tolong tukuak
tolong sisik di nan ompang.
Kan iyo baitu? Ba,a dek ambo diateh nan lai ciek kurang,e tigo ambo tukuak. Tapi ateh nan indak sagalo nan tabaco diamak tadi manuah jo ambo mak.

Mamak: sampai sutan?

Sutan: Sampai mak.

Mamak: nan jadi ban dek ambo kabakeh sutan kan ojok mamulangan undiangan alek kito nan datang. Ba,a dek sutan nan basabuik bisa tagamang lai kabajawek, bisa anyuik lai kabasonsong. Lah sanang pulo hati ambo. Yo ambo pulangan undiangan urang tu lai?
Sutan: InsyaAllah.

(mamak kembali memanggil kapalo mudo)

Mamak: Kapalo mudo.. Kini baitu Kapalo mudo, satempo diawa,e tadi undiangan Kapalo mudo ambo pajanjian, karano ambo bajalan indak baiyo, bakato indak bamolah dulu, dek Kapalo mudo alah mananti, dek ambo alah pulo ambo paiyoan. A bana paiyoan ambo tu, alah bulek aie di pambuluah, alah tajun aie dipamatang, jikok bulek,e lah bisa digolek,an jikok picak,e lah bisa dilayangan, lah saiyo kaji tantang itu, tantang kato kamanjawauk, undiangan kamamulangan taradok bakeh Kapalo mudo, alah diambo lo tarabik,e mah mak. Sakian bana

kapalo mudo: Sampai mak?

Mamak: Samapai.

Kapalo mudo:  Kini baitu amak, satempo diawa,e tadi undiangan ambo pajanjian, dek karano amak bajalan indak baiyo, bakato ndak bamolah dulu, undiangan taradok kabakeh ambo janji bapintak, istirahaik batiboan. Kan yo baitu?
Dek ambo alah mananti, dek amak alah pulo baioaiyoan. A bana paiyoan amak tu,alah bulek aie di pambuluah, alah tajun aie dipamatang, jikok bulek,e lah bisa digolek,an, jikok picak,e lah bisa dilayangan, lah saiyo kaji tantang itu. Tantang kato kamanjawauk, undiangan kamamulangan taradok bakeh amak alah di amak lo tarabik,e mah. Kan iyo baitu?
Ba,a dek ambo, jauah tampak asok, ampie tampak api, nan baado adangan tadi kan antaro kito baduo, kini amak lo nan mamulangan liak. Saancak-ancak tu nyeh. Sakian bana.

Mamak: Sampai kapalo mudo?

Kapalo mudo: Sampai mak.

Mamak: Nan jadi bana dek ambo kabakeh kapalo mudo kan mamulangan undiangan kapalo mudo, ba,a dek kapalo mudo nan tantang itu ibaraik jalan alah baluangan ibaraik kato alah bacabaa. Ba,a dek ambo disabuik baawa baakie bamulai bakasudahan, jikok satempo diawe tadi nan jadi ban dek kapalo mudo kabakeh ambo kan tantang pihak pado sambah jo injiangan tangan, sambah mitak dipamulie injiangan tangan mintak dilatak,an sahinggo undiangan sajo ka kapalo mudo baco. Kan iyo baitu?
Ba,a dek ambo tantang injiangan tangan kalau alah kito pabacoan sifaik,e saumpamo kito baoan. Sakian bana

Kapalo mudo: nan jadi bana dek ambo kabakeh amak kan tantang pihak pado sambah jo injiangan tangan, sambah mintak dipamulie injiangan tangan dilatak,an sahinggo undiangan sajo nan kaambo baco. Ba,a dek amak tantang pihak pado sambah kalau alah kito bacoan saumpamo kito baoan. Kan iyo baitu? Ba,a dek ambo tantang pihak pado sambah, samo-samo kito gantuangan kan nan tinggi, kito hampaan ka nan gadang, kito pulangan ka nan tau, kito bauik,an kahati nan suci muko nan janiah. Tantang pihak pado sambah nan sakali kini karataihnyo kito guluang, kalamnyo kito patah. Kito ibarahik,a tantang pihak pado sambah nan sakali kinid dulu mak.

Mamak: insyaallah. Bilo masoe kito bawoan liak


Bersambung... Tunggu tulisan selanjutnya tentang Siriah.

Tidak ada komentar :

Posting Komentar